من المواضيع الي ما مفهوماش بزاف عند الناس والي كتخلق بزاف د الأسئلة عندهم هو موضوع الروح القدس. بكلمة أخرى: شكون هو الروح القدس وآشنو الدور دياله فهاد العالم؟ هاد الأسئلة غادي نحاول نجاوب عليها فهاد المقال. كلمة روح فاللغة الأصلية كتعني أشياء مختلفة منها مثلا ريح أو طاقة أو قوة. الروح ما كيتشافش، كيف القوة والريح والطاقة حتى هما ما كيتشافوش.

الروح القدس هو روح الله وهو الأقنوم التالت من الثالوث الأقدس. اداً الروح القدس هو الله. الإله الحي الإله الحقيقي هو إله واحد الي اعلن على نفسه للبشرية فتلاته الأقانيم. وادا بغينا نعرفو أكتر عليه خصنا نمشيو لكلمتو الكتاب المقدس لّي هو المصدر الوحيد . المعلومات على الله ما كنلقاوهاش فكتب الفلسفة أو كتب التاريح لكن كنلقاوها فالكتاب ديالو الي وحا به على الأنبياء والرسل ديالو.

كنوجدو الروح القدس فالأصحاح الأول من سفر التكوين كيحوّم فوق المياه ملي كان يالله غادي يخلق واحد العالم زوين وعجيب من ديك الظلمة والروينة. ملي كنتأملو مزيان فكلمة كيحوّم كنلقاو أنها كتشير للفكرة ديال شي طير كتحضن فالعش ديالها على البيض الي منه غادين يخرجو الفراخ ديالها. نفس الكلمة تستعملات فسفر التثنية على النسر الي كتحوّم فالعش على الصغار ديالها.

خدمة الروح القدس

الخدمة الي دار الروح القدس فالتورات والعهد القديم هي تقريباً نفس الخدمة الي دار فالعهد الجديد. يعني أنه كان كيجدد الانسان وكيعمرو وكيعطيه مسحة وقوة. الفرق الوحيد الي بيناتهم هو أنه فالعهد الجديد كيدير هاد الحوايج مع كل المؤمنين المسيحيين الي مولودين من جديد، لكن فالعهد القديم كان كيدير هاد الشي غير مع أشخاص معينة الي كان هو اختارها، الي منهم أنبياء كيف متلا النبي إليا والنبي أليشع ومنهم ملوك كيف الملك شاول والملك داود ومنهم قضاة كيف جدعون وشمشون. شمشون هدا هو هداك سمسون الي دارو عليه أفلام كيمتلوه ديما كبير وعنده العضلات بحال هداك الهولك. لكن شمشون الحقيقي ما كانش بحال هاكدا.

الفيلمات ميريكان ما كيرسموش لنا الواقع. كيشدو شي شخصية تاريخية وكيديرو عليها شي فيلم ولكن كيزينوه لدرجة كيولي شخصية خارقة العادة والقصة كتولي شي تخربيقة لأن هدفهم ماشي باش يتقفو الناس لكن التسلية فقط. وداك الشي لّي باغين الناس. شمشون كان قاضي من قضاة إسرائيل وكانت القوة الي عندو ماشي من العضلات ولا القلدة ديالو، وهناك احتمال كبير أنه كان إنسان عادي والمنظر دياله عادي بحالي وبحالك. لكن ديك القوة كانت كتجيه مرة مرة ملي كينزل عليه الروح القدس. واحد المرة قتل سبع وما بغى حتى واحد يعرف داك الشي الي طرى. وتصور دابا شي واحد قتل سبع، غادي تلقاه منوض حايحة وداير سيلفي معا السبع وحاطو فالفايسبوك والقيامة نايضة. الشخصيات التاريخية كنقراو عليها فكتب التاريخ وشخصيات الكتاب المقدس كنقراو عليها فكلمة الله وما كنتعرفوش عليها فأفلام هوليود ولا بوليوود.

ملي المسيح كان على وجه الأرض كانت مدة خدمته ديال التبشير بمملكة الله غير3 سنين. وملي قرّب الوقت باش يرجع للسما بدا كيدكر التلامد ديالو بهاد الشي، وكلامه حزنهم بزاف لكن هو أكد لهم بانه ما غاديش يخليهم كيف اليتامى لكن غادي يرسل لهم واحد المعزي آخر الي هو الروح القدس. وهاد المعزي أو المعين غادي يجي يسكن فيهم ويبقى معهم الى الأبد. وكلمة معزي كتعني فاللغة الأصلية: (هداك الي كيوقف حدا شي واحد). يعني هداك الي كيعاون.

الفكرة هنا هي ديال شي واحد الي واقف معاك كيعاونك وكيشجعك وكينصحك. المسيح كان فالحقيقة كيقول: أنا ماغاديش نخليكم كيف اليتامى لكن غادي نصيفط لكم واحد الي غادي يعلمكم ويعاونكم ويشجعكم ويدبر لكم فاحتياجاتكم .

هكدا مع كل واحد ملي كيصبح مؤمن بالمسيح كيجي الروح القدس يسكن فيه وكيختمو او كيف كنقولو احنا كيطبعو أو كيحط الطابع دياله عليه كيف شي ضمانة. وكيشهد لهاد المؤمن أو المؤمنة أنهم أولاد الله.

الخدمة ديال المسيح سالات فالعشاء الأخير قبل ما يموت على الصليب كيف تنبأو الأنبياء. والخدمة ديال الروح القدس بدات بوضوح ملي نزل على التلامد فيوم الخمسين باش يسكن فيهم. كانو مجموعين وعلى غفلة سمعو صوت ريح قوية وشافو بحال ألسنة من العافية الي تحطات على كل واحد فيهم. وكيقولو أن هداك اليوم هو فين تولدات فيه الكنيسة.

الروح القدس كيقنع العالم بحقيقة الخطية والتقوى وحكام الله.

الروح القدس عنده بزاف د الأعمال والأنشطة. لكن ممكن أهم خدمة كيديرها هي أنه كيف قال عليه المسيح كيقنع العالم بحقيقة الخطية والتقوى وحكام الله. اداً روح الله كيخدم حتى فقلوب هادوك الي ماشي مؤمنين وكيدكرهم بطبيعتهم الخاطية وكينبههم أنهم محتاجين للغفران. وملي كيتجاوبو معاه وكيفتحو قلوبهم ليه كيڭوّدهم للحق والنجاة. دونك هو الي كيشهد للمسيح وكيڭوّد الناس له ملي كيبدا يخدم فقلوبهم.

روح الله كيعطي كدلك القوة والحكمة لخدّامو.

ماكيعطيهاش غير للأنبياء والرسل والمبشرين بالإنجيل لكن لكل مؤمن ومؤمنة باش يقدرو يخدموه ويتغلبو على الدنب والخطية فحياتهم ويعيشو حياة الطاعة والقداسة.

من ضمن الحوايج الي قال المسيح عليه هما:

أولا : أنه معلم. يوحنا 14: 25-26

ݣَاعْ هَادْشِّي ݣْلْتُه لِيكُمْ وْأَنَا مْعَاكُمْ. وَلَكِنْ الْمُعِينْ اللِّي هُوَ الرُّوحْ الْقُدُسْ، اللِّي غَيْصِيفْطُه الْآبْ بْالْإِسْمْ دْيَالِي، رَاهْ هُوَ اللِّي غَيْعَلّْمْكُمْ كُلّْشِي وْيْفَكّْرْكُمْ بْكُلّْ مَا ݣْلْتْ لِيكُمْ.

بكلمة أخرى المسيح كيقول لهم: انا درت خدمتي وعلمتكم ورشدتكم، لكن ملي يجي الروح القدس غادي يكمل الخدمة ديالي.

ثانيا: كيسميه معين أو معزي. يوحنا 16.15:14

وْأَنَا غَنْطْلَبْ مْنْ الْآبْ وْغَيْعْطِيكُمْ مُعِينْ آخُرْ، بَاشْ يْبْقَى مْعَاكُمْ عْلَى الدّْوَامْ،

لكن آش كيعني المسيح بكلمة آخر ملي قال: معين آخر؟ هادا كيعني بأن المسيح براسه كان معزي ومشجع لأنه ماجاش باش يسرق ويقتل ويهلك لكن جا باش يعاون ويشجع وينجي...المسيح قال: يوحنا 10:10

الشّْفَارْ مَا كَيْجِي غِيرْ بَاشْ يْسْرَقْ وْيْقْتَلْ وْيْخَرّْبْ، وَلَكِنْ أَنَا جِيتْ بَاشْ تْكُونْ عَنْدْهُمْ حَيَاةْ، حَيَاةْ فَايْضَة بْالْخِير.

أغلبية البشر عايشة فالتعاسة والشقاء وهازين أحمال كتيرة على ضهورهم وما محتاجينش للضرب والقهر لأنهم ديجا مضروبين ومقهورين. الناس محتاجة لمعزي ومعين الي يريحهم من أتعابهم. المسيح قال:

أَجِيوْ لْعَنْدِي آ اللِّي عْيِيتُو كُلّْكُمْ وْاللِّي هَازِّينْ الْحْمَلْ التّْقِيلْ وْأَنَا غَنْعْطِيكُمْ الرَّاحَة. هْزُّو النِّيرْ دْيَالِي عْلِيكُمْ وْتْعَلّْمُو مْنِّي، حِيتْ أَنَا ضْرِيّْفْ وْمْتْوَاضْعْ، وغَادِي تْلْقَاوْ الرَّاحَة لْنْفُوسْك وْرَاهْ . النير ديالي ساهل والحمل ديالي خفيف.

تالتاً: روح الحق. يسوع كيسميه كدلك روح الحق. يوحنا 17:14.

هُوَ رُوحْ الْحَقّْ اللِّي مَا قَدْرُوشْ نَاسْ الدّْنْيَا يْقْبْلُوهْ، حِيتْ مَا كَيْشُوفُوهْشْ وْمَا كَيْعَرْفُوهْشْ. وَلَكِنْ نْتُمَ رَاكُمْ كَتْعَرْفُوهْ، عْلَاحْقَّاشْ سَاكْنْ مْعَاكُمْ وْغَادِي يْكُونْ فِيكُمْ.

هو لّي كيعطي الهدايا والمواهب.

من الأدوار المهمة ديال الروح القدس هو أنه كيفرق المواهب او الهدايا الروحية على المؤمنين دياله وكيعطيها لهم حسب مشيئتو وحسب حكمتو. روح الله كيعطي للمؤمن كدلك الحكمة والفهم وكيعاونو باش يفهم كلام الله الي موحى به فالكتاب المقدس.

كاين الي كيقول أنه هناك 9 الهدايا أو المواهب ديال الروح القدس لكن كاينين كدلك آخرين الي كيركزو على سبعة المواهب لأنهم كيقولو أن العدد سبعة كيشير للكمال فالكتاب المقدس.

الرسول بولس كيقول فرسالته الى أهل كورونتوس: 12: 7-11

وَلَكِنْ كُلّْ وَاحْدْ كَيْتّْعْطَاهْ الرُّوحْ الْقُدُسْ بَاشْ يْبَيّْنْ الْمَوْهِبَة اللِّي

كَتْنْفَعْ وْهَكَّا، رَاهْ وَاحْدْ تّْعْطَاهْ بْالرُّوحْ كْلَامْ الْحْكْمَة،

وْوَاحْدْ آخُرْ كْلَامْ الْمَعْرِفَة وْكُلّْهُمْ مْنْ رُوحْ وَاحْدْ. وْبْنَفْسْ الرُّوحْ تّْعْطَى الْمُعْجِزَاتْ،

وْلَاخُرْ النُّبُوَّة، وْلَاخُرْ تَمْيِيزْ الْأَرْوَاحْ، وْلَاخُرْ يْتّْكَلّْمْ بْلُغَاتْ مْخْتَلْفَة،

وْلَاخُرْ التَّرْجَمَة دْ هَادْ اللُّغَاتْ. هَادْ الْأُمُورْ كُلّْهَا كَيْدِيرْهَا نَفْسْ الرُّوحْ،

وْكَيْفَرّْقْهَا عْلَى كُلّْ وَاحْدْ كِمَا بْغَا هُو.

المواهب الروحية أعطاها لنا الروح باش يسهل علينا الحياة ونقدرو نطيعوه ونرضيوه. الرسول بولس كيدكرنا فرسالتو الى أهل كورونتوس أن الروح اعطانا هاد المواهب باش المؤمنين كدلك يشجعو بعضهم البعض ويبنيو بعضهم البعض وهكدا كيمجدوه فحياتهم كسفراء ديالو فهاد العالم كيخبرو البشر بمحبته ونعمتو.

المواهب الروحية مهمة لكن تمار الروح أهم. الرسول بولس قال:

إِلَا كْنْتْ كَنْتّْكَلّْمْ بْلُغَاتْ النَّاسْ وْالْمَلَايْكَة وْمَا عَنْدِيشْ الْمْحَبَّة، رَانِي نْحَاسْ كَيْطَنْطْنْ وْنَاقُوسْ كَيْزَنْزْنْ.

ملي الروح القدس كيسكن فالمؤمن أو المؤمنة كيبدا يخدم فقلبهم باش يولي عندهم تمار فحياتهم. تمار الي من ضمنها: المحبة والفرح والهنا والصبر والضرافة والإيمان والرزانة وأعمال الخير.

هاد الغلة أو التمار ما يقدرش الإنسان الي ما كيسكنش فيه روح الله يخلقها بمجهوداتو وبالتديّن ديالو. هاد التمار هي منتوجات ديال عمل الروح وحضوره فحياة المؤمن.

نقدرو نلخصو كلام اليوم بالقول أن من ضمن الحوايج الي كيدير الروح فحياة المؤمن والمؤمنة هي أنه:

كيسكن فيهم وكيختمهم. كيعطيهم مسحة وقوة. كيفرّق عليهم المواهيب الروحية. كيعطيهم الڭارانتي على النجا ديالهم. أفسس 13:1 كيعاونهم فالصلاة. كيغسلهم وكيجددهم. كيشجعهم وكيختابرو الحضور دياله. كيعمرهم بالفرح والسلام.

كيقدسهم وكينبههم على الدنوب باش كيجيو بغلة وبتمار الروح. لهدا الكتاب كيآمرهم باش يعمرو بالروح كيف كتقول الآية فالرسالة إلى أفسس 18:5

وْمَا تْسَكْرُوشْ بْالْخْمَرْ حِيتْ كَيْتّْسَبّْبْ فْالْفْسَادْ، وَلَكِنْ تْعَمّْرُو بْالرُّوحْ الْقُدُسْ.

المؤمن كيعمر بالروح ملي كيسلم إرادته وحياته ليه.

ويمكن السؤال دابا لّي كيطرحوه البعض هو: كيفاش نقدر نحصل على الروح القدس؟ أو بعبارة أخرى: آش خصني ندير باش يكون عندي الروح القدس؟ الكتاب المقدس كيقول لنا أن الإنسان كيجي يسكن فيه الروح القدس ملي كيتوب من دنوبه وكيآمن بالرب يسوع المسيح وكيقبلو كرب ومنجي فحياته.

كلمة أخيرة

روح الله كيقبلوه أولاد الله المولودين من جديد لأنهم كيعرفوه وعندهم علاقة معاه. أما الغير المؤمنين ما يقدروش يقبلوه لأنهم ما ما كيشوفوهش وما كيعرفوهش وما كيفهموهش. الأشياء الروحية كتتفهم غير بالروح.

ملي المؤمن والمؤمنة كيتوقعو بأن روح الله ساكن فيهم وأنه كيڭودهم فحياتهم ويعطيهم قوة ومسحة باش يعيشو حياة معجزية وملي كدلك كيتوقعو بأن الروح القدس غادي يبقى ديما معهم وما عمرو ما غادي يمشي عليهم ولا يخوي بهم، ديك الساعة كيعمر قلبهم بالفرح وبالشكر لهاد الإله العجيب وكيزيدو يلتاسقو بيه ويرضيوه.

شوف الفيديو فاليوتيوب

Related Stories