أشهر كتاب فالتاريخ هو الكتاب المقدس. هو الي كيتباع أكتر من الكتب كلها. وما خصناش نتعجبو ادا سماوه كتاب الكتب. لكن علاش يا ترى الناس مهتمين هاد الاهتمام كله بهاد الكتاب؟ آش عند هاد الكتاب الي ما عندش الكتوبة الأخرين وعلاش كيتباع اكتر منهم كلهم؟ مجلة طايم الأمريكية كتبات فواحد الطبعة ديالها أنه ما كاينش شي كتاب الي غير التاريخ والأدب والثقافة والسينما والفن كيف الكتاب المقدس والتأثير دياله كتير لواحد الدرجة غير عادية مازال وغادي وكيزيد. كيقولو بأن أكثر من 5 مليار نسخة من هاد الكتاب تباعت. هدا كيعني أنه كتباع 100 مليون نسخة كل سنة و273.972 نسخة فاليوم 11.415 كل ساعة و190 نسخة كل دقيقة و3 نسخ كل ثانية. الرب قال فسر إشعياء: "وكيما كتنزل الشتا والتلج من السما وما كيرجعوش قبل ما كيرويو الأرض وكيرضوها كتنبت باش تعطي الزريعة للزارع والماكلة للواكل، هكدا كلمتي الي كنقولها ما كترجعش لي بلا نتيجة لكنها كتدير داك الشي الي خططت وكتنجع فالخدمة الي سيفتطها تدير". إشعياء 55.

الكتاب المقدس كيحكي لنا على عمل الله فهاد العالم وآشنو المقصود بالخليقة دياله. الكَتْبة دياله خادت ممكن اكتر من 1600عام .الله استخدم حوالي ربعين كاتب الي أوحى عليهم كلمات هاد الكتاب... كلمة الكتاب المقدس أو لابيبل جات من كلمة يونانية كتعني "كتب"، ونقدرو نقولو ان الكتاب المقدس هو عبارة عن مكتبة صغيرة أو مجموعة ديال الكتيبات الي هي موجودة فكتاب واحد. وهاد الكتيبات هما مختالفين فالأسلوب ديالهم وكل كتيّب عنده الأسلوب الأدبي دياله الخاص. رغم دلك فإنه كاينة واحد الوحدة وواحد الانسجام بيناتهم. لآنهم عندهم رسالة وحدة الي الله باغينا نعرفوها.

عدد هاد الكتيبات أو أسفار الكتاب المقدس هو 66.. 39 منها كاينة فالعهد القديم و27 فالعهد الجديد. العهد القديم تكتب تقريبا كله باللغة العبرية، فيه غير شي أجزاء قليلة الي تكتبات باللغة اللأرامية وهاد اللغات بوج هما لغات سامية وكيتشابهو بزاف... أما العهد الجديد فهو مكتوب كله باللغة اليونانية لأنها كانت هي اللغة الي كيكومينيكيو بها الناس فداك الوقت من دول الناحية الشرقية ديال البحر الأبيض المتوسط. قول تقريباً من ليبيا ومصر الى الشرق الأوسط واليونان والمنطقة الي كانت كتسمى آسيا الصغيرة والي كتسمى دابا تركيا.

العهد القديم

الكتاب المقدس مقسوم لجوج أقسام: العهد القديم والعهد الجديد. اليهود كيآمنو غير بالعهد القديم وقسموه لتلاتة أقسام: التورات وكتب الأنبياء والكتابات، الي كنوجدو فيها كدلك سفر المزامير الي البعض كيسميوه الزابور. داود كان كتب الأغلبية ديالها. العهد القديم هو عبارة عن واحد ال كوليكسيون ديال قصات تاريخية وشعر ومزامير وصلوات وأمثال ورسائل ونبوات. كلها موحى بها من الروح القدس. العهد القديم كيرسم لنا هاد الإله العجيب وتعاملاته الخاصة مع بني إسرائيل كشعب. كنلقاوه كيتعامل كدلك بطريقة خاصة مع أفراد معينة من بني إسرائيل الي اختارها كيف مثلا إبراهيم ويعقوب وموسى... زايد على هاد البشي كنقراو على التدخل دياله مع البشر عامتا فمجرى التاريخ... فالبدو ديال الكتاب كيحكي على كيفاش الأنسان خسّر علاقته مع الله وكيفاش الله خطط واحد البلان باش يصالح معاه الانسان وينجيه وكيفاش بدا هاد التخطيط دياله ملي دار واحد العهد مع بني إسرائيل وملي من بعدها سيفط الأنبياء دياله الي جاو وتنبأو بالمجي ديال واحد الشخص سماوي عجيب الي هو مسيح الله الي غادي ينفّد هاد البلان ديال النجا وخلاص البشرية ..

نقدرو نقولو إدن أن الكتاب المقدس هو كتاب اليهود والمسيحيين. الفرق الي كاين هو أن اليهود ما كيآمنوش بالتلوت دياله، يعني ما قابلينش العهد الجديد الي كيحكي فيه على المسيح وخدمته وتعاليمه هو وخدمة الرسل دياله ورسائلهم. والسبب على هاد الشي هو أن اليهود ما قبلوش يسوع الناصري كمسيح الله الي كانو كينتضروه. دونك إدا بغينا نلخصو هاد الشي بواحد الطريقة بسيطة غادي نقولو أن اليهود كيقبلو غير العهد القديم من الكتاب المقدس أما المسيحيين فكيقبلو الكتاب كله.

العهد الجديد

أما من ناحية العهد الجديد الي البعض كيسميه الإنجيل، وكلمة إنجيل كيف شفنا ففيديو آخر هي ماشي كلمة عربية لكن كلمة يونانية فالأصل وكتعني "خبار الخير"....كاينين الي كيقولو أن كتيبات العهد الجديد تكتبات فضرف خمسين عام لكن حتى واحد ما كيعرف التاريخ ديالها بالظبط. هناك احتمال أن الروح القدس بدا كيحرك الرسل فكتابة العهد الجديد ورا الوقت ديال المسيح بربعين عام. ربعة الكتيبات الي كيتسماو كدلك أناجيل كيحكيو على حياة المسيح وأعماله وتعاليمه وموته وقيامته من الموت والرجوع دياله للسما. واحد من هاد الربعة الكتّاب الي هو الطبيب لوقا ما كانش رسول لكن كان ممكن من دوك 70 التلامييد الي الرب كان عينهم للتبشير بالإنجيل فداك الوقت، وهاد لوقا كتب كدلك سفر أعمال الرسل فين كيحكي فيه على حياة الكنيسة الأولى وخدمتها للرب... الرسول يوحنا حتى هو كتب رسائل مختلفة للكنيسة الي منها سفر الرؤيا. وهاد السفر هو آخر سفر فالكتاب المقدس. الأسلوب دياله عجيب وغريب، فيه كيحكي هاد الرسول على نهاية العالم... الرسول يوحنا ما جبدش هاد الشي من راسه لكن شافه فرؤى مختلفة الي الرب كان أعطاه... ألأسفار الأخرى هي عبارة عن رسائل كتبوها الرسل للكنائس باش يوصيوهم ويشجعوهم وينهيوهم وكدلك يحذروهم من الدياب الي كتجي مسيفة، يعني دياب لابسة بطانة وداخلة وسط الخرفان، كتبان بحال الخرفان لكن هي دياب مفترسة. يعني كيحدرو المؤمنين من الأنبياء الكدابة والمعلمين الكدابة الي جاو باش يفترسو القلوب البسيطة.

الأغلبية من هاد الرسائل كان كتبها الرسول بولس وهاد الشي كله كان عن وحي من روح الله ولهدا هاد الشي هو فالحقيقة كلام الله ماشي كلام البشر.... هدوك الي كتبو العهد الجديد كانو حتى هما كلهم يهود. يمكن لوقا هو الوحيد الي ماكانش يهودي. كاينين كيقولو أنه كان يوناني لكن كايننين كدلك الي كيقولو أنه كان فعلا يهودي من أنطاكية.

فالكتاب المقدس كنلفاو قصات على الحياة ديال ناس أبرار وناس أشرار، كنقراو على حروب وعلى أسفار وعلى حياة يسوع المسيح وعلى حياة الكنيسة الأولى وخدمتها. فهاد الكتاب كنلقاو حوارات وأمثلة وأمثال وحكايات رمزية ونبوات وأحدات تاريخية الى آخره.

الهجومات على الكتاب المقدس

إبليس حاول عبر العصور باش ينفي كلمة الله لأنه ما باغيش الناس يجيو لمعرفة الحق وما باغيهمش يكتشفو النور لكن باغي يخليهم يبقاو عايشين فالضلمة. هجومات إبليس على كتاب الله والدعايات دياله الكادبة غير كتأكد لنا على صحة هاد الكتاب... حاشا واش الله يسمح لكلمته أن تفنى أو تتغير أو تتزور لأنه حاضيها وحاميها و مستحيل يسمح لشي واحد يمسها كيف ما كان إنسان أم ملاك.

هجومات إبليس وخدامه على الكتاب المقدس هي فالحقيقة هجومات على المؤلف ديال هاد الكتاب، والمؤلف هو الله. دونك العداوة الي موجهة لكتاب الله هي فالحقيقة موجهة لله بنفسه.... المسيح قال: "كلام الله عمرو ما كيطيح."

الكتاب المقدس عرف هجومات كتيرة عليه وكاينة كاع دول الي كتمنعه حتى ييدخل لها وحاصرة على ان المواطنين ديالها ما يعرفوش آش فيه. لكن الأنترنت بدلات الأوضاع ويقدر أي شخص فأي بلاد يقرا الكتاب المقدس بأي لغة على الشاشة ديالالكومبيوتر ولا البورطابل دياله....لكن وخصنا نتساؤلو علاش هاد الخوف كله من كتاب وآشنو السبب؟.علاش هاد الكتاب منوض حايحة فهاد العالم؟

شحال من واحد كان كيهاجم كتاب الله وكيقول عليه أقوال كادبة، لكن ملي بدا شي مرة كيبحث وكيقرى فيه بدا كيكتشف أن هاد الكتاب مختلف كل الاختلاف على الكتب الأخرى... أي إنسان كيف ما كان مثقف ولا بسيط لكن كيبحث بقلب خالص وباغي فعلا يعرف الحق وكيفتح قلبه وروحه بكل تواضع لكلمة الله كيبدا روح الله فنعمته يخدم فقلبه وكيبدا يخاطبه وكيقودو للحق والنجا لأن الرب واعد أن كل واحد كيقلب غادي يلقى، وكل واحد كيدق غادي يحل له الباب.

أنا شخصيا كنعرف ناس كتار الي اختابرو هاد الشي. والناس الي كيكتشفو الإله الحي الإله الحقيقي هما من كل بيئة وأنواع وأشكال. منهم بسطاء منهم طلبة منهم مفكرين ومنهم حتى قضاة الدين من كل العقائد والأديان.

مخطوطات البحر الميت

فسنة 1947 كان واحد الشاب فلسطيني كيسرح الغنم قريب من قرية قمران فنواحي البحر الميت، وكان كيقلب على واحد المعزة تودرت له. وفواحد الغار من دوك الغيران الي كينين تم اكتشف مخطوطات دينية قديمة. فجاو علماء الآثار وزادو اكتاشفو آلاف د المخطوطات أخرى فالغيران ديال ديك المنطقة. وهاد المخطوطات هاد الي من بعد سماوهم مخطوطات البحر الميت، لقاو فيها كتابات دينية من ضمنها أسفار العهد القديم من الكتاب المقدس الي بعض العلماء كيقولو أن تاريخها من نص القرن التالت قبل الميلاد. يعني أنها كانت تمّا على الأقل 250 عام قبل من المجي ديال المسيح للأرض.... هاد المخطوطات القديمة بقات مخبية ووبقات فحالة مزيانة لأكتر من ألفين سنة. وادا قارنتيها مع العهد القديم ديال دابا غادي تلاحظ أن كلمة الله هي هي، ما تحرفات ما تغيرات ما تزورات، وغادي تشوف وتفهم ان الله كيحتفظ بكلمته وكيحرص على انها تبقى هي هي. المسيح قال:

متى 35:24 رَاهْ السّْمَا وْالْأَرْضْ غَيْفْنَاوْ وَلَكِنْ كْلَامِي عَمّْرُه مَا غَيْفْنَى

الكتاب المقدس ماشي كتاب عادي لكنه كلمة الله الحية. هاد الشي كيعني أن الكلام الي فيه هو كلام حي. هاد الشي كيعني أن الكلمات دياله ديناميك وفيها قوة وحياة لأنها كلمات الله...الآية كتقول:

حِيتْ كْلَامْ اللَّهْ حَيّْ وْقْوِي، وْمْضَى مْنْ كُلّْ سِيفْ مَاضِي مْنْ جُوجْ جْوَايْهْ، عبرانيين 12:4

الأنسان كيكتشف هاد الشي ملي كيبدا يقراه بقلب مفتوح كيف قلت وبقلب خالص. لأن مشكل الأنسان وعداوته لكتاب الله ما جايش من الجهل لكن من عدم الإيمان ومن قساوة قلبه. المصدر ديال عداوة الانسان لكلمة الله هي طبيعته الخاطية الي ديما كتهرب من النور لأنها ما قادراش تتحملو وكتفضل تبقى عايشة فالضلمة.

كاتب المزمور 119 قال: كلامك يا ربي مصباح لرجلي ونور فطريقي. 105:119

نقدرو نختمو كلامنا ديال اليوم بالقول أن الكتاب المقدس هو :

واحد المرشد كيعطينا واحد الخريطة كتعاونا فالسفر ديالنا فالطريق الصعيبة ديال هاد الحياة. واحد المعلم مثلو بشي بوسول كتڭودنا فالبحر او المحيط ديال الحياة .

فالكتاب المقدس كنفهمو راسنا شكون احنا كبشر وكنفهمو أن الله ما خلقناش بحال لي روبو لكن خلقنا ككائنات عجيبة ومميزة، قلقنا بواحد الهدف وواحد البلان زوين لأنه كيبغينا وكيبغي لنا الخير.

فالكتاب المقدس كنلقاو واحد النمودج وقواعد. فالصفحات دياله كنتعلمو كيفاش خصنا نعيشو وكيفاش خصنا نتصرفو مع الناس الآخرين. فيه كنتعلمو الأخلاق الحسنة والمبادء السامية . فيه كنلقاو أقوال المسيح المبهضة كيف متلا ملي قال فمتى 5:44

بْغِيوْ عْدْيَانْكُمْ، وْدْعِيوْ مْعَ هَادُوكْ اللِّي كَيْتّْعَدَّاوْ عْلِيكُمْ.

غير قول لي وقولي لي واش كاين شي كتاب فيه بحال هاد الكلام؟

فصفحات الكتاب المقدس كنلقاو تشجيع وتعزية، بالنسبة لي انا شخصيا كنلتجأ لسفر المزمير ملي كنمر من أوقات صعيبة. شحال ديال الناس عبر العصور كيشهدو انهم لقاو قوة وتشجيع وتعزية وحرية وسلام فالكتاب المقدس فأوقات الحزن والمرض والألم، فالغربة والوحدانية، فالحباسات والسبيطارات، فالمدن والصحرا ، فالجبال والبحور وفكل مكان.

النبي إرمياء قال: لقيت كلامك وكلتو وولى فرح وبهجة لقلبي،

خويا المؤمن واختي المؤمنة: خصنا حتى احنا نتعلمو ناكلو كلام الله كيف دارهاد النبي. لكن آش كننعني بهاد الكلام؟... تاكل كلام الله كنعني تقبله بإيمان وتتأمل فيه مزيان. تاكل كلام الله كنعني تخليه يدخل فدماغك ويغمرالأعماق ديالك. تاكل كلام الله كنعني تخليه يغدي داتك ويغدي روحك.... لكن خصك تنضغو مزيان. الماكلة ما كتجيش وتصرطها لكن كتنضغها مزيان ادا بغيتيها تنفعك. بكلمة أخرى: ملي كتتأمل فكلام الله وتخليه يغمر قلبك وكيانك، ديك الساعة غادي يطرى لك الي طرى للنبي إرمياء. غادي تختبر بهجة وفرح وسلام فقلبك. هادي هي صلاتي ليك انت وانتي.

شوف الفيديو فاليوتيوب

Related Posts